Видео: Барса го демолира Јувентус, рутина за скапите „светци“ и „ѓаволи“

Барселона покажа дека е силна и без Нејмар па го декласираше Јувентус со 3:0 во првото коло од ЛШ. Рутински победи на Баерн, Челзи, ПСЖ и Јунајтед, без голови во Рим.

Дербито на вечерта се играше на „Камп Ноу“ каде Барселона уште еднаш покажа моќ и го декласираше италијанскиот шампион Јувентус, а херој за Каталонците повторно беше Лео Меси.

Во првото полувреме гледавме израмнета борба, Јувентус споредично се закани преку Игуаин, Дибала и Бентанкур, но при самиот крај Меси после една одлична акција го матираше Буфон и со предност замина на одмор.

Во второто полувреме видовме целосна доминација на Каталонците. Најпрво вон 56-та минута Меси одзеде една топка и го проигра Ракитиќ кој погоди за 2:0, а конечните 3:0 ги постави Аргентинецот во 69-та минута.

Најубедливи вечерва беа фудалерите на Челзи, кои го декласираа Карабах со 6:0. Педро и Запакоста ја отворија голеадата, за потоа меѓу стрелците да се запишат и Аспиликуета, Бакајоко, Батшуаи, а на крајот Медведев си постигна и автогол

Баерн Минхен со головите на Левандовски, Алкантара и Кимих славеше над Андерлехт со 3-0. Со истиот резултат Манчестер Јунајтед го победи Базел, а стрелци беа Фелаини, Лукаку и Рашфорд.

Триото на ПСЖ Нејмар- Кавани – Мбапе си поигруваше со Селтик и оствари висока победа од 5:0. Кавани постигна два гола, по еднаш погодија Нејмар и Мбапе, а домаќините си постигнаа и автогол преку Лустинг.

На останатите натпревари, Рома и Атлетико одиграа без голови, додека Спортинг Лисабон и ЦСКА Москва остварија гостински победи над Олимпијакос односно Бенфика.