Валверде по пресвртот против Рајо зборуваше за ситуацијата со Малком и Дембеле

Барселона вчера на гостински терен го совлада Рајо Ваљекано со 3:2 во натпревар од 11-тото коло од шпанската Ла Лига.

Каталонците во самиот финиш на натпреварот имаа негатива од 2:1, но само за три минути успеаа да го свртат резултатот и да освојат три бода. Гостувањето во Рајо беше потешко од очекувањата за Барселона, но сигурно дека на крајот најважно е што ја продолжија низата на победи.

Ернесто Валверде се најде на удар на навивачите на Барселона бидејќи и овој пат Малком не беше во конкуренција за настап. Исто така, не им се допаѓа што Осман Дембеле ги започнува натпреварите од клупата, а предност има Рафиња.

Токму Дембеле ја затресе мрежата на Ваљекано за 2:2 и така го најави пресвртот. Но, Валверде одлучи да објасни како стојат работите околу Малком и Дембеле.

„Сигурно дека времето на Малком ќе дојде и ќе добие шанса. Пред секој натпревар припремам список за играчи кои ќе ми требаат за натпреварот, а кои не. Некогаш ќе изостане Малком, а некогаш Дембеле“, изјави Валверде.