Агентот му одговори на таткото на Самарџик и откри зошто пропаднал трансферот во Интер

Лазар Самарџиќ беше на чекор од трансфер во Интер, дури ги мина и лекарските прегледи, но трансферот пропадна во последен момент.

Самарџиќ се врати во Удинезе, а неговиот татко за пропаднатиот трансфер ја обвини менаџерката Рафаела Пимента.

„Интер направи грешка, преговарал и постигнал договор со лице кое немало дозвола да преговара во името на мојот син. Зборувале со Рафаела Пимента, која сум ја видел само еднаш во животот, не ми е јасно како таа се вклучила во преговорите бидејќи тие беа меѓу Интер и Удинезе“, изјави таткото на Самарџиќ.

Меѓутоа, веднаш стигна одговор од Пимента која откри зошто пропаднал трансферот.

„Имавме состанок заедно во седиштето на Интер, се договоривме со нероазурите дури и наздравивме со него и со неговата сопруга. Имаше видео кол за организација на медицинските тестови на неговиот син, плус беше организирано доаѓање на негови роднини и камерман. По сето ова, неговиот татко излезе со барања со кои јас не се согласив и одлучив да се тргнам од зделката“, изјави Пимента.