ФОТО: Чичарито во Премиер лигата поефикасен од многу големи имиња

Хавиер Ернандез Чичарито се врати во Премиер лигата.

Имено, овој одличен мексикански напаѓач од Баер Леверкузен се пресели во Вест Хем за 16 милиони фунти, а неговиот трансфер би можел да биде „договор на деценијата“ за „Чеканите“, само доколку Чичарито во Премиер лигата продолжи по старото.

Вест Хем изминативе години не имаше премногу среќа со напаѓачите, па така само еден напаѓач на Вест Хем успеа да постигне двоцифрен број на голови во една сезона од кога оваа екипа се врати во елитата на најдобрите во 2012. година. Тоа беше Диафра Сако кој во сезоната 2014/15 постигна 10 гола.

Сепак, ефикасноста на Чичарито во Премиер лигата, во времето кога го носеше дресот на Манчестер Јунајтед прави навивачите на Вест Хем да се надеваат на одлична сезона за нивниот клуб.

Чичарито за Манчестер Јунајтед во Премиер лигата постигна 37 гола во 103 одиграни натпревари, со тоа што само во 49 натпревари беше стартер, а статистиката говори дека тој во најелитното натпреварување во англискиот фудбал постигнуваше гол на секои 130.2 минути.

Тоа го става на петото место на листата на најефикасни фудбалери во историјата на Премиер лигата.

Прв на оваа листа е Серхио Агуеро кој постигнува гол на секои 109.8 минути, следуваат Хари Кејн, Тиери Андри и Руд Ван Нистелрој, а веднаш зад овие фантастични напаѓачи е токму Чичарито Ернандез.

 Мексиканецот зад себе остави навистина големи имиња во светскиот фудбал, па така на оваа листа зад него се наоѓаат Луис Суарез, Робин Ван Перси, Ернан Греспо, Един Џеко и Даниел Стариџ.