Сколс го избра најпаметниот играч на светот: Никој не ја контролира играта како него

Пол Сколс (49) е еден од најголемите играчи од средниот ред во историјата на Премиер лигата, а многумина би рекле и во фудбалот воопшто.

Легендарниот Англичанец целата своја играчка кариера ја мина во Манчестер Јунајтед, за кој забележа 499 настапи и постигна 107 голови. Тој е во пензија од 2013 година, а моментално работи како стручен коментатор на ТНТ Спортс.

Сколс ги коментираше натпреварите во Лигата на шампионите оваа недела, а на социјалните мрежи вирална стана една изјава што ја даде пред натпреварот помеѓу Реал и Баерн на „Сантијаго Бернабеу“.

Имено, во најавата за натпреварот, Сколс го издвои Тони Крос како „најпаметниот фудбалер на светот“.

„Тони Крос е неверојатен. Го гледав натпреварот на ПСЖ против Борусија Дортмунд. Им недостасуваше Тони Крос. Никој не ја контролира и диктира играта како тој. Тој ги има сите вештини потребни за тоа. Тој ќе биде клучен играч вечерва. Тој е креаторот на разликата, Тухел мора да најде начин да го спречи. Нема да му биде лесно, Крос е најпаметниот играч за врска во светот“, изјави пред натпреварот Сколс.

И навистина, Крос одигра одлична партија. Само Хоселу, стрелецот на два гола вредни за пласман во финалето, доби повисок рејтинг од германскиот играч за врска. Според Sofascore, Хоселу заработил 9,0, а Крос 7,9.