Ова не му личи: Мурињо прво удри по „главниот виновник“ за поразот, а потоа и крена раце од се

Менаџерот на Манчестер Јунајтед, Жозе Мурињо даде краток коментар на натпреварот со Манчестер Сити на „Олд Трафорд“ кој заврши со резултат 2:1.

„Црвените ѓаволи“ денес беа во подредена положба во дуелот со градскиот ривал, но Мурињо главната вина ја најде во арбитарот Мајкл Оливер.

„Првата реакција? Жал ми е за судијата Мајкл Оливер бидејќи судеше одлично се до една кардинална грешка. Да го досудеше пеналот кој требаше, резултатот на 20 минути до крајот би бил 2:2. Пеналот над Херера беше чист“, истакна Мурињо.

На прашањето дали трката за титулата е готова, Мурињо даде одговор кој баш и не му личи и делуваше како веќе да се помирил со судбината.

„Мислам дека да. Манчестер Сити е одлична екипа, но имаат и среќа. Заштитени се од фудбалските богови“, заклучи Португалецот.

Манчестер Јунајтед по 16 кола има 11 бодови негатива во однос на Манчестер Сити кој игра импресивна сезона.