Мората веќе си бара куќа во Лондон

Алваро Мората на крајот на сезоната ќе го напушти Реал Мадрид, а неговата иднина е Премиер лигата, тврдат медиумите на Островот.

Имено, сопругата на Мората, Елис Кампело била во посета на Лондон за да бара живеалиште, односно куќа во која ќе живеат двајцата.

Како главен фаворит за неговиот потпис се споменува Челзи на Антонио Конте, кој е во потрага по квалитетен напаѓач за следната сезона бидејќи иднината на Диего Коста на „Стенфорд Бриџ“ е неизвесна.

Во секој случај, дури и да остане Коста, италијанскиот стратег сака да има двајца врвни напаѓачи и Мората е неговата најголема желба.

Мората оваа сезона има постигнато 13 гола на 31 натпревар за „кралевите“, но не е задоволен со својот статус во Мадрид и сака да ја промени средината.

Се претпоставува дека висината на трансферот ќе изнесува помеѓу 60 и 70 милиони евра.