Венгер лично се јави, Ница бара 40 милиони, Тотенхем, Борусија, ПСЖ „на чекање“

Уште пролетоска се знаеше – кога ќе почне преодниот рок, името на Жан Сери често ќе се врти во муабетите на сите клупски емисари во Ница.

25-годишниот играч за врска од Брегот на Слоновата коска е најбараниот играч и едно од најпријатните изненадувања во текот на завршената сезона во Лига 1. Иако со недели се шпекулираше дека Барселона е фаворит за добивање на потписот од Сери, дури сега почнаа да стигнуваат поверојдостојни информации за неговата нова дестинација.

Додуша, Барса уште е во фаворитите, но Сери не е нејзин прв избор и шансите тој да стигне на Камп Ноу се мерат во проценти. Но, ако Барселона не е, Арсен Венгер и тоа како е заинтересиран, па угледниот новинар од The Guardian, Ед Аронс, тврди дека францускиот стратег, преку посредници, лично разговарал со Сери за неговиот потенцијален трансфер во Арсенал.

Е таму веќе и би можел да игра, а тоа што Венгер лично се заложи за него може да биде добра појдовна основа за Сери. Арсенал е сериозен играч во конкуренцијата од Тотенхем, Борусија Дортмунд, ПСЖ и Рома (чија понуда неодамна беше одбиена) кои го сакаат Сери во своите редови.

Претседателот ан Ница, Жан Пјер Ривер не ни размислува за можноста играчот кој летото 2015 година го доведе за само еден милион евра да го даде под цена од 40 милиони евра.

Ница на драго срце би го задржала Сери уште една сезона. А и тој беше за таа опција сè додека не почна да се пишува за Барселона. Од тој момент тој почна и јавно да бара дозвола да го напушти Азурниот брег. Иако конкретна понуда од Барса воопшто не стигна, сепак, толку многу написи и текстови кои те поврзуваат со најголемиот клуб во Европа можат да ти го поматат разумот.