Агентот на Касиљас: Икер имаше среќа што ова му се случи на тренингот на Порто

Легендарниот Икер Касиљас вчера претрпе срцев удар на тренингот на Порто. Шпанецот се огласи вечерта преку социјалните мрежи и порача дека се чуствува добро.

Агентот на Касиљас гостуваше во емисијата „Ел Партидазо“ каде што објасни што се случувало и порача дека ова било најголемата победа на Касиљас во неговиот живот.

„Кон средината на денешниот тренинг, Икер започна да се жали дека нешто не е во ред. Се жалеше на болки во градите, устата и рацете. Воопшто не беше свесен дека добива срцев удар“.

„Многу голема среќа имаше што сето тоа се случуваше на тренингот на Порто пред докторите на овој тим кои веднаш реагирале и превземале мерки пред да стигне во болница. Доколку вакво нешто доживеше дома не сакам ниту да помислам какви ќе беа последиците“, изјави агентот на Касиљас.

Потоа тој зборуваше за можноста Икер да се врати на теренот.

„Икер после настанот беше истиот, се шегуваше, беше весел и сакаше да ја напушти болницата. Тој е голем борец, зошто да не се врати на терените? Меѓутоа засега тоа не е приоритет, најважно е да биде целосно здрав“.

„За него ова е поголема победа од онаа на Светското првенство, ова е најголемиот триумф во неговиот живот“, заврши човекот кој се грижи за кариерата на легендарниот шпански голман.