Халанд под тешки критики по дебаклот во Норвешка: „Знаев дека ќе избега“

Норвешка загуби од Австрија во четвртото коло од Б категоријата на Лигата на нации со високи 5:1.

Норвешките фудбалери не беа расположени за разговор по овој дебакл, но дел од нив сепак застанаа пред новинарите и одговараа на прашања.

Меѓу нив го немаше Ерлинг Халанд, кој во овој циклус ја водеше Норвешка како капитен бидејќи го немаше Мартин Одегард. Халанд само помина низ зоната без да одговори на ниту едно прашање, поради што беше критикуван од норвешката јавност.

„Во таква ситуација навистина би сакале да го слушнеме. Беше интересно да го слушнеме по големиот успех против Словенија, но сакаме да го слушнеме неговиот збор и кога работите ќе тргнат на лошо.

Капитенот добива пофалби кога работите одат добро, а тогаш имате дополнителна одговорност кога работите не одат добро“, рече Кристофер Локберг, фудбалер, кој беше стручен коментатор на овој натпревар.