Ферстапен ја освои пол-позицијата во Бахреин

Макс Ферстапен ќе стартува од пол-позицијата на првата сезонска трка во Формула 1 шампионатот што утре ќе се вози за Големата награда на Бахреин. 

Возачот на Ред Бул беше најбрз во денешните квалификации со време 1:29.179 на стазата „Шакур“. Ова за Ферстапен е 33. пол позиција во кариерата со што се израмни со Џим Кларк и Ален Прост.

Во првиот стартен ред на бранителот на шампионска титула друштво ќе му прави Шарл Леклер од Ферари. Трето време имаше пилотот на Мерцедес, Џорџ Расел. Потоа следува Карлос Сајнц, Серхио Перез, Фернандо Алонсо, а најдобрите десетмина ги комплетираат двајцата возачи на Мекларен, Ландо Норис и Оскар Пиастри, Луис Хамилтон и Нико Хулкенберг.