Откриена заработката на судиите во Премиер лигата. Еве колку добиваат по натпревар

Дискусиите за предизвикувачкиот карактер на работата на фудбалските судии стануваат се почести во Англија. Количината на притисок под кој работат во Премиер лигата е огромна. Описот на работата е да трпат навреди од навивачите, а во случај на грешка, судиите се напаѓаат од медиумите, социјалните мрежи и телевизиските личности.

Поранешниот премиерлигаш, а сега коментатор Џермејн Џенас неодамна преку Твитер го навреди судискиот тим од лондонскиот дерби дуел помеѓу Арсенал и Тотенхем, по што го избриша статусот и се извини на англиската ФА и на судиската професија во целина.

Некои британски медиуми веќе пишуваа дека фудбалот таму страда од недостиг на судии, бидејќи се помалку млади се одлучуваат на тој повик во ситуација кога судиите трпат навреди и разни форми на насилство дури и на полупрофесионално ниво.

Сепак, достигнувањето на самиот врв на таа професија и судењето во највисокиот ранг на островскиот фудбал има свои предности, особено финансиски. Англискиот портал GiveMeSport открива дека судиите во Премиер лигата заработуваат меѓу 110.000 и 240.000 фунти годишно, додека нивниот бонус по натпревар е 1.500 фунти.

За споредба, просечната годишна плата Англија е околу 28.000 фунти. Помошниците судии заработуваат 30.000 фунти годишно со бонус од 850 фунти по натпревар, а исто толку заработуваат и ВАР судиите.