Ѓорческа подобра од Јапонката Саито во Мадрид!

Најдобрата македонска тенисерка Лина Ѓорческа успешно го стартуваше настапот на ВТА 125 турнирот во Мадрид, откако славеше убедлива победа над Јапонката Сара Саито со 2-0 во сетови (6:4, 6:4) по час и половина игра.

Во следната рунда, Ѓорческа ќе се соочи со осмата носителка, Русинката Алина Корнеева, која исто така со максимални 2-0 (6:3, 6:3) ја елиминираше Шпанката Марија Гарсија.

Мечот започна со нестабилна игра на двете страни, па и двете тенисерки рано загубија по два сервис-гема. Сепак, македонската претставничка успеа да се наметне и да поведе со 4:3, а иако Саито намали на 5:4, Ѓорческа во клучниот момент покажа сигурност и по долга размена од 14 поени ја искористи четвртата брејк-топка за водство од 1-0 во сетови.

Во вториот сет се играше изедначено до 3:2 за Ѓорческа, по што следуваше серија од брејкови на двете страни. Македонската тенисерка не ја искористи првата меч-топка на свој сервис во деветтиот гем, но во завршницата беше сигурна и со нов брејк го затвори сетот со 6:4 за конечен триумф.

Турнирот во Мадрид се игра за награден фонд од 100.000 евра.