Лоши вести за „граѓаните“: Познато колку ќе отсуствува Агуеро

Напаѓачот на Манчестер Сити, Серхио Агуеро ќе го пропушти натпреварот против Кардиф кој на програмата е утре, потврди Пеп Гвардиола.

Најдобриот стрелец во Премиер лигата го напушти теренот во 57-та минута на мечот против Фулам овој викенд кој „граѓаните“ го добија со 2:0.

Агуеро исто така ќе биде под знак прашалник и за мечот од ФА Купот против Брајтон кој се игра во сабота.

„Не тренираше последните два дена и утре сигурно нема да биде повикан за натпреварот. Можеби ќе биде спремен за сабота, но треба да видиме како ќе напредува следните денови“, изјави Гвардиола.

Планот на Гвардиола е Агуеро да биде подготвен за мечот од Лигата на шампиони против Тотенхем кој на програмата е следниот вторник.