Ѕвезда на Барселона конечно проговори за тешката животна борба

Роналд Араухо, еден од клучните дефанзивци на Барселона, првпат отворено зборуваше за тешкиот период низ кој минуваше надвор од теренот, но и за борбата со менталното здравје која траеше повеќе од една година.

Уругвајскиот репрезентативец се најде во центарот на вниманието откако беше исклучен при поразот на Барселона од Челси во Лигата на шампионите на „Стамфорд Бриџ“, а токму тој момент беше пресвртница во неговиот живот.

По тој натпревар клубот му одобри отсуство за да може да се посвети на себе и на својата рехабилитација, далеку од притисокот на професионалниот фудбал.

Зборувајќи за моментот на исклучување, рече: „Во тој момент, со наплив на адреналин, едноставно одиш на сè. Чувствуваш тага, но тогаш, кога натпреварот ќе заврши, сè се руши на твоите плеќи. Веќе чувствував дека не сум добро, тоа е вистина, но од навика се обидуваш да продолжиш понатаму, а понекогаш ти е потребна помош”, рече за Мундо Депортиво.

Тие зборови јасно покажуваат колку тежок товар носел на своите плеќи, иако изгледаше силно и подготвено за најголемите предизвици.

Во продолжение отворено призна: „Година и пол се борев со анксиозност која се пренесе во депресија и така играв. Тоа не помага, бидејќи на теренот всушност не се чувствуваш како ти. Знаеш колку вредиш и што можеш да придонесеш на теренот, и кога не се чувствував добро, знаев дека нешто не е во ред. Тој ден сфатив дека е тоа, дека морам да зборувам со професионалци и со клубот за тие да можат да ми помогнат.”