Заминува од Ливерпул како еден од најголемите неуспеси досега. Ќе заработува трипати повеќе

Ливерпул и Ал Хилал постигнаа договор за трансфер на Дарвин Нуњез, што се смета за еден од најзначајните потези на ова лето. Договорена е фиксна сума од 53 милиони евра, со дополнителни бонуси кои можат да ја зголемат вредноста на трансферот до 65 милиони евра. Со тоа, Ливерпул успеа да врати дел од инвестицијата во уругвајскиот напаѓач.

26-годишниот Нуњез пристигна во Ливерпул од Бенфика пред три години по трансфер вреден 85 милиони евра. Не беше ефикасен како што се очекуваше, и за три сезони, односно 143 натпревари, постигна 40 гола. Минатата сезона му беше најлоша за „Црвените“, со само седум гола во 47 натпревари.

Клучен фактор во оваа трансфер-сага беше понудената плата. Нуњез во Ливерпул заработуваше околу 7 милиони евра годишно, што е помалку од главните ѕвезди на клубот како Мохамед Салах или Вирџил ван Дајк. Ал Хилал му понуди тригодишен договор вреден 24,2 милиони евра по сезона, што е блиску до највисоките плати во саудиската лига и трипати повеќе од тоа што го добиваше на Енфилд. Според Capology, тој треба да биде десеттиот најдобро платен играч во саудиската лига.

Иако имаше интерес од други клубови како Милан, никој не беше близу финансиските услови кои ги понудија Саудијците. Ливерпул претходно годинава одби понуда од Ал Наср, а Милан призна дека не може да ги постигне нивоата на плата и отштета кои ги нуди Ал Хилал.

Со оглед на спортскиот и деловниот контекст и намалената минутажа минатата сезона, трансферот се смета како добар потег за двете страни. Ливерпул забележува профит од продажбата на играчот над неговата книговодствена вредност, додека Нуњез обезбедува ѕвезден статус и финансиска стабилност во кариерата.