Ван Дајк за Трент: Во Ливерпул секогаш ќе го паметат по добро

Ливерпул е на чекор до 20. титула во лигата. Херој на победата над Лестер беше стрелецот на единствениот гол, Трент Александар-Арнолд, кој сѐ уште нема потпишано продолжување на договорот.

За детето на Ливерпул, еден од најдобрите десни бекови во светот, договорот истекува на крајот од јуни. Тој сѐ уште нема потпишано продолжување, а според многу информации, веќе има постигнато договор со Реал да премине во Мадрид како слободен играч.

Сепак, капитенот на „Црвените“ Вирџил ван Дајк го пофалува својот соиграч и заменик капитенот за сѐ што направил за клубот.

– Откако дојдов во клубот, тој беше феноменален. Ќе биде запомнет по многу добри работи за Ливерпул, дури и ако одлучи да замине. Што и да се случи во иднина, тоа е нешто што тој ќе мора да го реши заедно со семејството. Но, тој сѐ уште е играч на Ливерпул и е важен за нашиот тим – изјави Ван Дајк.

Токму Ван Дајк го продолжи договорот со Ливерпул, истото го направи и Мохамед Салах.