Рубен Дијаш потпиша нов договор со Манчестер Сити

Столбот во одбраната на Манчестер Сити – Рубен Дијаш, го продолжи договорот со клубот до 2029 година.

“Граѓаните” го привлекоа Португалецот од Бенфика во 2020-та и во овој петгодишен период освои 10 трофеи. Во првата сезона на “Етихад” беше прогласен за Играч на сезоната во Премиер лигата и ја освои наградата на Здружението на фудбалските новинари.

“Толку сум горд што го претставувам овој голем клуб. Сити е местото каде што сакам да бидам – на врвот во спортот, да се бориме за трофеи. Амбицијата на клубот совршено се совпаѓа со мојата и како фудбалер нема ништо поубаво од тоа. Го сакам Манчестер – сега ова е мојот дом – и ги сакам навивачите на Манчестер Сити. Нивната поддршка од првиот ден беше апсолутно неверојатна и многу ја ценам. Кога ќе размислам за трофеите кои ги освоивме и начинот на кој игравме фудбал за време на мојот престој тука, не можам да си замислам да играм на друго место.”