ПСВ ја одбрани титулата во Холандија

Тимот од Ајндховен успеа да ја заокружи сезоната со одбрана на титулата првак на Холандија.

Пред еден месец, по триумфот на Ајакс против Вилем со 2:1 во гости, изгледаше како „копјаните“ сигурно чекорат кон освојување на титулата. Сепак, во остатокот од сезоната, тие ја растурија својата предност и го загрозија сето она што го постигнаа до тој момент.

Потоа следеа четири разочарувачки натпревари за нив, почнувајќи со дебаклот против Утрехт (4:0), па до шокантното реми со Гронинген минатата недела, кога Ајакс прими гол во деветтата минута од продолжението и покрај тоа што имаа играч повеќе, за конечни 2:2.

ПСВ ги искористи овие пропусти и со серија од победи успеа од девет бодови негатива да се издигне до првото место минатиот викенд и да ја потврди таа позиција денес.

Во последното коло, ПСВ гостуваше кај Спарта во Ротердам и извојува победа од 3:1, додека Ајакс го победи Твенте со 2:0 пред своите навивачи.

По ваквиот развој на настаните, ПСВ задржа предност од еден бод и ја освои својата 26-та титула во историјата на клубот како првак на Холандија.