Претседателот на Наполи: Стадионот Диего Марадона е депонија за ѓубре

Претседателот на Наполи Аурелио Де Лаурентис го нарече стадионот во Неапол “депонија за отпадоци”, тврдејќи дека на клубот му е потребен модерен стадион за да ги зголеми приходите и да го подобри искуството на навивачите.

Наполи минатата сезона ја освои втората титула шампион на Серија А во последните три години, по голема борба со Интер од Милано. Домашните натпревари ги играат на стадионот Диего Армандо Марадона, наречен по аргентинецот кој ги водеше до два шампионата во 1987 и 1990 година. Стадионот припаѓа на општина Неапол.

Говорејќи на настан организиран од миланскиот универзитет Бокони, Де Лаурентис ја спореди заработката од натпреварите на Наполи со онаа на миланските клубови, велејќи дека Милан и Интер можат да остварат приход од 14 милиони евра за натпревар во Лигата на шампионите, додека неговиот тим во тој сегмент е ограничен.

„Можеме да добиеме само три милиони во депонијата на Марадона. Тоа е голема разлика, зарем не?“ рече тој.

Оваа недела, Милан и Интер ја завршија куповината на стадионот Сан Сиро и околната земја од градските власти, што е следен чекор кон уривањето на стадионот и изградбата на нов.

„Би сакал да имаме стадион со 70.000 места, 120 ложи и 8.000 паркинг места“, рече Де Лаурентис, додавајќи дека обновата на Марадона – која има атлетска патека – би траела шест години.

„Ни требаат уште 30 хектари за изградба на прекрасен стадион“, заклучи Де Лаурентис.