Премиер лигата воведува нов вид на ВАР систем, еве за што станува збор

Премиер лигата одлучи трајно да воведе полуавтоматска ВАР технологија за одредување на недозволена позиција, која ќе биде имплементирана од 12 април, почнувајќи од 32. коло на натпреварувањето.

Оваа одлука следеше по успешните тестирања на технологијата за време на ФА купот и дополнителните проверки во рамките на самата лига. Целта е да се забрза процесот на донесување одлуки за офсајд, што често предизвикуваше фрустрации поради долготрајните проверки и нејаснотии.

Технологијата користи систем за оптичко следење на играчите и топката, што овозможува прецизно поставување на виртуелната линија за офсајд. Кога ќе се случи клучен момент, како гол или пенал, системот автоматски испраќа предупредување до ВАР службениците, кои потоа ја потврдуваат точноста на сниманите податоци пред да го известат судијата на теренот. Овој процес значително го намалува времето потребно за донесување одлука и ја зголемува конзистентноста во примената на правилата.

Полуавтоматската технологија веќе беше тестирана на големи натпревари како Светското првенство 2022, Лигата на шампиони и Азискиот куп, каде се покажа како ефикасно решение за спорни ситуации. Премиер лигата сега го следи примерот на тие натпреварувања, со цел да обезбеди подобро гледачко и натпреварувачко искуство. Графичките прикази на одлуките ќе бидат достапни не само на телевизиските преноси, туку и на големите екрани внатре на стадионите, со што се зголемува транспарентноста за навивачите.

Хауард Веб, изјави дека новата технологија значително ќе ја подобри брзината на донесување одлуки, а истовремено ќе ја осигура нивната точност. “Иако процесот е полуавтоматски, клучните фази како идентификација на точката на контакт со топката сè уште бараат човечка верификација,” нагласи Веб.

Тој додаде дека графичките прикази на одлуките дополнително ќе го унапредат разбирањето на судските интервенции меѓу навивачите.

Првото коло во кое ќе се користи полуавтоматската технологија вклучува неколку атрактивни средби, меѓу кои се Манчестер Сити против Кристал Палас и Ливерпул против Вест Хем. Ce oчекува дека новата технологија ќе ги намали контроверзиите околу офсајд и ќе ја забрза динамиката на натпреварите, што ќе биде значителен чекор напред за најгледаната фудбалска лига во светот.