Одигра епски меч со Алкараз, па замина и плачеше во соблекувалната на Вимблдон

Неодамна се збогува Фабио Фоњини од Мастерсот во Рим и комплексот „Форо Италико“, а сега дојде на ред и збогувањето од Вимблдон.

Никој не очекуваше дека 38-годишникот ќе даде толку силен отпор против Алкараз, дека ќе игра четири и пол часа и ќе освои два сета. Сето тоа го направи Фабио Фоњини и ги освои симпатиите на публиката, и покрај поразот.

На крајот беше 7:5, 6:7, 7:5, 2:6, 6:1 за Шпанецот, кој во второто коло ќе се сретне со Британецот Оливер Тарвет, кој не е ниту во топ 700 на АТП ранг листата. Се очекува полесна задача во однос на Фоњини, кој на прес-конференцијата по дуелот откри дека плачел.

„Плачев во соблекувалната. Искрено, не очекував да играм пет сета против него. Немав никакви очекувања денес, имајќи предвид како дојдов на овој меч. Мислам дека нема подобар начин да се простам од Вимблдон или дури и од тенисот“, најави Фоњини.

Фото: Принтскрин