Новиот дрес на српската репрезентација ќе го има ликот на Синиша Михајловиќ?

Фудбалскиот сојуз на Србија е на пат да најде нов технички спонзор, откако заврши соработката со Пума, а веста е дека на новите дресови ќе стои ликот на легендарниот Синиша Михајловиќ!

Како што јави реномираната Газета дело спорт, која за ова објави текст во своето печатено издание, нов технички спонзор на ФСС треба да биде италијанската компанија Макрон, стационирана во Болоња, а новиот дрес на Србија да го носи белегот на славниот играч.

Врската помеѓу Болоња и Синиша Михајловиќ е посебна, бидејќи тој се лекуваше од леукемија во овој град и додека ја тренираше оваа екипа. Болоња особено го сака и го памети, а по контактите меѓу Фудбалскиот сојуз на Србија и Макрон, италијанската компанија веднаш излезе со идејното решение на дресот да го наслика Синиша Михајловиќ, неговата карактеристична силуета при изведувањето слободен удар, како и негов моќен мотивациски цитат, кој на играчите ќе им даде посебен мотив да се борат како што се борел самиот Синиша, и на теренот и надвор од него кога ја водеше битката на својот живот.

Нема сомнение, тоа би бил еден од најемотивните дресови во историјата на српскиот фудбал и единствен, бидејќи таква идеја не е видена во светот на фудбалот.

Според Газета, Влаховиќ, Митровиќ, Миленковиќ и други српски репрезентативци се воодушевени од оваа идеја, што не е чудно, бидејќи на дресот ќе имаат еден од нивните идоли, легенда на српскиот фудбал.

Според неофицијални информации, покрај Макрон, ФСС добиле уште две понуди, но тоа се брендови кои се целосно на маргините во фудбалскиот свет и непознати за пошироката јавност, па понудата од Италија е најпримамлива.

Фудбалскиот сојуз наскоро треба да ја донесе конечната одлука, бидејќи Србија на 20 и 23 март веќе ќе ги има натпреварите од плеј-офот од Лигата на нации против Австрија.