Левандовски подготвен да ја намали платата, но Барса не брза со новиот договор

Тековниот договор помеѓу Роберт Левандовски и Барселона истекува на крајот од оваа сезона, а иднината на Полјакот останува неизвесна. Неговата желба е да продолжи на „Камп Ноу“, дури и е спремен на значителна финансиска жртва, но раководството на каталонскиот клуб разгледува и други фактори, пред да понуди нов договор.

Во последните недели се појавија многу шпекулации околу идната дестинација на Роберт Левандовски од сезоната 2026/2027. Многу клубови од Саудиска Арабија, како и големи имиња од европскиот фудбал како Милан или Манчестер Јунајтед, покажуваат интерес да го привлечат Полјакот како слободен играч.

Понатаму, според новинарот Доминик Пиехота, сонародник и близок до напаѓачот на Барселона, Левандовски е подготвен дури и на драстично намалување на својата плата, за да остане на „Камп Ноу“ и следната сезона. Сепак, желбата на напаѓачот е да продолжи во Барселона, клуб за кој што игра од 2022 година и со кој досега има освоено пет трофеи (две шампионски титули, една купа и две суперкупни на Шпанија).

„Можно е ова да му биде последната сезона за Роберт во Барселона. Веќе има многу силни клубови кои се заинтересирани за него. Како од Европа, така и од Саудиска Арабија, но неговата желба е да остане во Барселона, дури и со огромно намалување на платата, тоа не му претставува проблем. Тој сака да продолжи да игра там и да се бори за стартно место. Тој и неговото семејство се чувствуваат многу удобно во Шпанија“, откри Доминик Пиехота.