Лампард близу сензација и најголемиот тренерски успех во кариерата

Френк Лампард и Ковентри Сити се предупредени дека би било „катастрофа“ ако оваа сезона не обезбедат директно влегување во Премиер лигата, со оглед на тоа колку понекогаш беа доминантни во Чемпионшип-лигата. Легендата на клубот Гари Мекалистер објасни зошто „големата одлука” да се доведе Лампард се исплатила за клубот кој е надвор од највисокото ниво веќе 25 години, пишува Goal.com.

Ковентри беше редовен член на Премиер лигата од нејзиното основање во 1992 до испаѓањето на крајот од сезоната 2000/01. Следеше пад во пониски рангови, а клубот допре дното во 2017 година со испаѓањето во Лига две, четвртиот ранг на англискиот фудбал. Две промоции во три сезони го вратија Ковентри во борбата за врвот, а оттогаш два пати обезбедија и плеј-оф. Сега, Лампард е човекот задолжен за исполнување на големите очекувања.

Во еден момент од сезоната неговиот тим имаше 10 бода предност, но таа разлика се намали на само два бода. Сепак, Ковентри повторно фати залет и сега има осум бодови повеќе од третопласираната екипа, а во клубот повторно се размислува за борба за титулата.

Со оглед на тоа што Лампард ја обновува својата тренерска репутација по тешките периоди во Челси и Евертон, еден од најголемите предизвици за Ковентри би можел да биде задржувањето на 47-годишниот стручњак. Поранешниот напаѓач на клубот Клинтон Морисон смета дека Лампард нема намера за брзо заминување.