Конте верува во титулата на Наполи: Навивачите го заслужуваат тоа

Тренерот на Наполи, Антонио Конте, изјави дека неговиот тим и понатаму игра над своите реални можности и додаде дека верува дека клубот од Неапол може да ја освои титулата во Серија А, објавија денеска италијанските медиуми.

Фудбалерите на Наполи одиграа нерешено на домашен терен против Џенова (2:2) во неделата вечер, додека Интер го совлада Торино на гости (2:0) во 36. коло на Серија А.

Наполи, две кола пред крајот на италијанското првенство, се наоѓа на првото место на табелата со 78 бодови, додека Интер е втор со 77.

– Завршницата на сезоната претставува цел која на почетокот беше апсолутно незамислива. Би било неверојатно да го оствариме тоа. Овие навивачи го заслужуваат, бидејќи луѓето од Неапол нè следеа со страст и ентузијазам – рече Конте.

– Сѐ уште играме над нашите реални можности, и затоа можеме само да им се заблагодариме на овие играчи за сè. Горко е, бидејќи резултатот не беше праведен, но секогаш им велам дека деталите ја прават разликата, а во тие детали можевме да бидеме подобри – додаде тренерот на Наполи.

Тој истакна дека Наполи пропушти многу шанси на натпреварот против Џенова.

– Џенова имаше два удари во рамките на голот и постигна два гола. Такви работи се случуваат во фудбалот – кога примаш гол, секогаш постои нешто што можеше да го направиш подобро – наведе Конте.

Фудбалерите на Наполи ќе гостуваат кај Парма во 37. коло, а потоа во последното коло ќе го пречекаат Каљари. Интер ќе го пречека Лацио на својот терен, а потоа ќе гостува кај Комо.

Фото: Принтскрин