Консеисао е минато: Ибрахимовиќ го избра новиот тренер Милан?!

Фудбалскиот клуб Милан повторно тргнува од почеток. Серхио Консеисао не ги исполни очекувањата, иако започна одлично, со освојување на трофеј во Суперкупот на Италија.

„Газета дело Спорт“ утрово открива дека Роберто Де Зерби повторно е опција број еден.

Тој и летово беше поврзуван со Милан, но не дојде до договор, па избра Олимпик Марсеј. Инаку, не е тајна дека Де Зерби е голем фан на Милан и никогаш не криел дека неговиот сон би се остварил ако ја преземе клупата на „росонерите“.

Проблем е што Де Зерби има договор со Марсеј до летото 2027 година и францускиот клуб нема така лесно да го пушти.

Како други опции се споменуваат и познати имиња, Антонио Конте и Масимилијано Алегри, иако тие не ја добија целосната поддршка од управата на Милан.