Како е возможно? Олимписките медали од Париз целосно се распаѓаат

Олимписките медали од Париз целосно се распаѓаат…

Освојувачите на медали од Олимписките игри во Париз помалку од половина година по светското натпреварување се огорчени од состојбата на нивните највредни признанија во кариерата.

Веќе еден месец по завршувањето на Олимписките игри во Париз, некои спортисти се жалеа дека нивните медали почнале да се “распаѓаат”. Неколку месеци подоцна, ситуацијата е таква што медалите целосно се распаѓаат.

Двајца француски пливачи, Клемент Секи и Јоан Ндоје-Бруар, вчера објавија фотографии од нивните медали. Истакнаа лошата состојба на бронзените одличја кои ги освоија во Париз и така се придружија на многумина олимпијци кои укажаа на состојбата на медалите.

Медалите, кои содржат железо од Ајфеловата кула, изгледаат “истрошено”, а површинскиот слој целосно е излупен. Секи и Ндоје-Бруар ги споделија фотографиите од своите медали кои ги освоија во машката штафета 4×100 метри мешано.

🚨Погледнете: Француските пливачи Клемент Секи и Јоан Ндоје-Бруар покажаа како изгледаат нивните медали од Олимписките игри 2024 во Париз. pic.twitter.com/sR42giNMWT

— CHOQUEI (@choquei) 29 декември 2024

Секи го опиша изгледот на медалот со зборовите дека тие се излупиле како “кожа од крокодил”, додека Ндоје-Бруар во шеговит тон ја спореди својата медала со онаа од Олимписките игри во 1924 година.

Ова е само продолжение на скандалот со олимписките медали во Париз, па организаторите мораа да реагираат и ветиле дека на сите спортисти ќе им бидат заменети оштетените медали.

Што се однесува до златните медали, тие, секако, не се целосно златни. Само на Олимписките игри во 1904, 1908 и 1912 година медалите биле произведени целосно од чисто злато.

Меѓународниот Олимписки комитет наметна норма која вели дека во златниот медал на Олимписките игри влегуваат шест грама чисто злато. Преостанатите 523 грама кои се користат за златниот медал се од сребро со минимална чистота од 92,5 проценти.