Јамал се врати со повреда, во Барселона се лути на Де ла Фуенте

Најголемата ѕвезда на Барселона, Ламин Јамал, е повреден и ќе го пропушти неделниот дуел со Валенсија на стадионот „Јохан Кројф“. Се покажа дека напаѓачот има болки во областа на карлицата и е под прашање за натпреварот против Њукасл во Лигата на шампионите наредната недела. Денес не тренираше.

На прес-конференцијата, тренерот Ханзи Флик објасни дека Јамал играл со болки и за националниот тим во минатите светски квалификации против Бугарија и Турција. Во двата натпревари одиграл над 70 минути. Не е јасно дали Јамал ги добил болките во Софија, Конја, или така пристигнал во кампот. Германецот дури индиректно го обвини селекторот на Шпанија, Луис де ла Фуенте, и неговиот тим за случувањата, бидејќи, според него, го пренатовариле.

“Ламин одигра по 75–78 минути со болки, без тренинг меѓу натпреварите – изјави Флик. – А тоа не е начин да се грижи за играчите. Мислам дека шпанскиот национален тим има одличен состав, најдобрите фудбалери во светот, но не внимаваа на своите играчи и оваа вест ме натажува. Никогаш немам разговарано лично со Де ла Фуенте, само преку пораки, но никогаш директно. Мојот шпански не е многу добар, ниту неговиот англиски, но на крајот, комуникацијата може да биде подобра. Не се работи само за еден играч, има и други. И јас сум бил во таква ситуација, но комуникацијата со клубот треба да биде добра.”