Играше за Атлетико, имаше проблеми со алкохол, а сега рапува и издаде албум

Џексон Мартинез (38), поранешен колумбиски напаѓач кој играше за клубови како Порто и Атлетико Мадрид, го издаде својот втор музички албум под наслов Кватро Тресе. Некогашниот фудбалер веќе неколку години се занимава со музика и стекна популарност како рапер, а неговите песни имаат илјадници стримувања.

Албумот содржи девет песни, меѓу кои се Madurez, Cada Mañana, La Mentira и Dios Cambia. Мартинез ја одигра последната професионална утакмица во 2020 година. За време на кариерата носеше дресови на Порто, Атлетико Мадрид и кинескиот Гуангжу FC, каде замина во 2016 година по една сезона во Шпанија. Беше и репрезентативец на Колумбија, но повредите сериозно му ја нарушија кариерата.

Мартинез е роден во колумбискиот град Кибдо, а во интервју за колумбискиот Канал 1 во 2021 година отворено зборуваше за минатото: “Живеев раскошно, бев окружен со алкохол, цигари и други работи. Уживував во тоа затоа што тоа не го гледав како грев, туку како нешто нормално. Никогаш нема да го видите Бога додека тој не е единственото што го имате”, рече Мартинез.

Повредите, за кои требаше да се подложи на неколку операции, го оддалечија од фудбалот и го наведоа да се посвети на музиката. “Во критичен момент од кариерата, по две операции и речиси двегодишна пауза без натпревари, почнав повеќе да се посветувам на пишување и одлучив да издадам албум”, се присети поранешниот напаѓач. Три години подоцна, има зад себе два албума и успешна музичка кариера.