Ѓокереш повторно ги променил приоритетите – сега сака во Манчестер Јунајтед

Виктор Ѓокереш повторно ги променил своите приоритети, воден од големата желба да го напушти Спортинг Лисабон.

Долго време се зборуваше дека Швеѓанецот најмногу сака да премине во Арсенал. Во средината на месецот во еден од спортските дневници во Португалија се појави информација дека агентите на напаѓачот го известиле Манчестер Јунајтед, кој исто така покажуваше интерес, дека Ѓокереш не сака трансфер на “Олд Трафорд”.

Во Арсенал, сепак, презедоа тактика на чекање и во моментот се знае дека имаат две главни опции за нападот – Бенјамин Шешко и Ѓокереш, но не даваат официјална понуда за ниту еден од нив, а медиумите во Англија во последните неколку недели тврдат дека повеќе се фокусираат на Словенецот.

Јувентус исто така беше заинтересиран, но изгледа “бианконерите” ќе се задоволат со привлекувањето на слободниот агент Џонатан Дејвид, бидејќи во Италија исто така излезе информација дека ѕвездата на Спортинг им одбил на “бианконерите”, затоа што сака да игра во Премиер лигата.