Фудбалерот на Барса брилјираше на Ел Класико против Реал, а сега го напушта клубот?

Барселона минатиот викенд го освои шпанскиот Суперкуп. Тие во финалето го совладаа Реал Мадрид во Ел Класико со огромни 5:2 и со тоа го освоија својот прв трофеј сезонава.

Во последното Ел Класико, 25-годишниот уругвајски дефанзивец Роналд Араухо влезе на теренот во 28. минута, откако Иниго Мартинез се пожали на повреда. Араухо одигра одличен натпревар, но шпанските медиуми пишуваат дека тоа не го менува фактот што е на излезна врата од Барса.

Ханси Флик претпочита други опции за дефанзивци, а Уругваецот не се согласил да го продолжи договорот кој е до следната година, а Каталонците не сакаат да го загубат бесплатно. Каталонскиот весник „Спорт“ вчера објави дека Араухо веќе им кажал на соиграчите дека ја напушта Барселона во јануари.

Слично тврдат и извештаите од Италија. Се очекува Араухо да му се приклучи на Јувентус на позајмица до крајот на сезоната, но Јувентус да има клаузула според која ќе може да го откупи на лето. Позајмицата би го чинела Јувентус пет милиони евра, со четири милиони евра за плата на играчот, колку што е неговата полугодишна плата во Барселона.

После тоа, Јувентус би имал опција да го купи Араухо за 20 милиони евра фиксно обештетување и пет милиони евра потенцијални бонуси. Договорот на Араухо со Барселона истекува во летото 2026 година, што значително ја намалува неговата вредност кога се во прашање преговорите.