„Чудото од дете“ веќе еднаш го одби Сити, но Гвардиола подготвува нов напад

Англискиот гигант Манчестер Сити повторно покажува сериозен интерес за чудото од дете од Валенсија, Жауме Дура, и покрај тоа што младиот офанзивен среднореден играч минатата година ги одби за да потпише нов договор до 2027 година. Како што пренесуваат шпанските медиуми, тимот на Пеп Гвардиола подготвува нов обид за донесување на ѕвездата на шпанската У-17 репрезентација, пишува Goal.com.

Според шпанското радио „Кадена Коп“, првакот на Премиер лигата повторно започна операција за доведување на 17-годишниот Дура. Наводно, Сити „не пропушта ниеден детал од неговиот напредок” додека тој се развива во академијата на Валенсија, што укажува на „сериозен интерес”.

Иако засега не е познато дали Сити планира да испрати понуда уште во јануари или ќе чека лето 2026, нивната намера да се вратат по играчот кој веќе еднаш ги одби е јасен знак колку веруваат во неговиот потенцијал. Валенсија, како што се наведува, мора “да биде на стража” поради обновениот притисок од англискиот великан.

Дура, кој ќе наполни 18 години дури во мај 2026 година, е продукт на познатата фудбалска школа на Валенсија. Моментално е капитен на клупската У-19 екипа и примарно игра на позицијата офанзивен среднореден играч, но сè уште чека на дебито во сениорскиот тим. И покрај младата возраст, веќе е стандард член на помладите селекции на шпанската репрезентација – за У-17 составот има одиграно 10 натпревари и постигнат еден гол.