Барселона: Се повлекуваме од Суперлигата!

Барселона денеска објави кратко соопштение, во кое се потврдува нешто што каталонските медиуми го најавуваа уште пред четири месеци.

„Фудбалскиот клуб Барселона објавува дека денеска ја информирала Европската Суперлига и клубовите дека се повлекува од проектот за Суперлига Европа“, со ова каталонскиот гигант стави крај на своето учество во создавањето на затвореното континентално натпреварување.

Најбогатите европски клубови се обидоа да формираат натпреварување во кое само тие би учествувале, со што би заработувале многу повеќе отколку што е случај во натпреварувањата под покровителство на УЕФА. Идејата за проектот Суперлига беше прифатена од клубовите во 2021.

Мотивот за основање на Суперлигата беше претежно финансиски, но сега Барселона е задоволна од новата финансиска распределба што ја определи УЕФА во новиот формат на Лигата на шампионите.

Односите меѓу УЕФА и Барселона значително се подобрија минатата година, а доказ за ова е што Барселона го прими претседателот на УЕФА, Александер Чеферин, како чест гостин во свечената ложа на натпреварот против Пари Сен Жермен на 1 октомври 2025.