Баерн не се шегува: Компани добива големо засилување до одбраната

Баерн Минхен се наоѓа на првото место во Бундеслигата и се големи фаворити за освојување на трофејот, но не сакаат ништо да препуштат на случајот, што го потврдува и овој потенцијален трансфер.

Баварците под водство на Винсент Компани изгледаат навистина одлично и заслужено се на чело на Бундеслигата.

Она што е особено впечатливо оваа сезона е нивниот дефанзивен рекорд, односно бројот на примени голови.

Во 17 одиграни лигашки натпревари, имаат примено само 13 голови што е убедливо најмалку од сите екипи. Следни се Мајнц и Ст. Паули со 21 примени гола.

Сепак, Компани, кој и самиот беше стопер, сака овој сегмент на игра да го доведе до совршенство, па бара дополнителни засилувања во задната линија.

Според португалскиот портал “Abola”, најголема желба на Баварците е Усмане Диоманд од Спортинг.

Минхенскиот клуб го следи фудбалерот од Брегот на Слоновата Коска веќе повеќе од една година и често ги испраќа своите скаути за да ги гледаат игрите на овој стопер во живо.

Последен пат скаутите на Баерн беа забележани пред пет дена на натпреварот од Лига купот во кој Спортинг играше против Порто.

Очигледно е дека има интерес, но не само од Баварците. Одличниот стопер го бараат и гиганти на англискиот фудбал, како Ливерпул и Челси и други.

Поради тоа, во Минхен одлучија да го забрзаат овој процес за да ги “претекнат” ривалите во ангажирањето на Диоманд.

Сепак, овој трансфер нема да биде евтин. Усман има откупна клаузула од 80 милиони евра и договор кој важи до 2027 година.

Спортинг во овој случај има сета “моќ” во преговорите, бидејќи стоперот и ним им е неопходен во борбата за титулата против Порто и Бенфика.

Работите во португалската Примеира лига се заострија, трите водечки екипи се наоѓаат во разлика од само три бода.

Поради ова, на Баварците нема да им биде толку лесно да го добијат Диоманд, но сите знаеме каква куповна моќ поседува Баерн.

На стоперските позиции меѓу другите веќе ги имаат Упамекано, Ким Мин-Џае и Дајер. Со пристигнувањето на Диоманд би создале вистински ѕид пред голманот, легендарниот Мануел Нојер.