Арбелоа ја откри тајната на блескавата форма на Винисиус: Само го пуштив да игра

Алваро Арбелоа, тренерот на Реал Мадрид, го пофали перформансот на Винисиус Жуниор, кој се стреми да продолжи со одличните изведби.

Кралскиот клуб вечерва го пречекува Гетафе во Ла Лига, а младиот тренер нема никакви сомнежи дека Бразилецот повторно ќе се обиде да се истакне на теренот, по досегашните шест постигнати гола во последните пет натпревари.

– Не знам дали притиснав некое конкретно копче. Целата заслуга е негова, бидејќи тој е фантастичен и извонреден фудбалер. Мојата единствена заслуга, ако така можам да кажам, е што му дадов многу самодоверба, се погрижив за него и ги охрабрив неговите соиграчи да го бараат на теренот и особено да го користат во ситуации каде што може да го покаже својот талент и способноста да си го најде патот меѓу противниците, да дрибла, да создава ситуации еден на еден, како што го направи неодамна. Тој е клучен играч и како тренер, мојата единствена задача е да создадам што повеќе прилики во кои може да ги искористи своите квалитети. Тоа ќе направи да играме подобро и да станеме поопасни – изјави Арбелоа на прес-конференцијата.

Се осврна и на ситуацијата со Килијан Мбапе кој ќе отсуствува од терените околу три недели поради проблем со коленото, и може да биде неизвесен за првиот меч од осминафиналето на Лига на шампионите против Манчестер Сити.

– Исклучително сме јасни за тоа што се случува и што сега сакаме, а тоа е тој комплетно да се опорави од непријатностите, за да се врати со 100 отсто, со највисока самодоверба и најголема можна сигурност. Сакаме да гарантираме дека ќе се чувствува потполно закрепнат. Ќе го следиме секојдневно и ќе го оценуваме неговиот напредок. Во овој момент е подобро да не поставуваме рокови. Сакаме да се врати кога ќе биде целосно подготвен – заклучи тренерот на Реал.