Aнализа: Македонија – Словенија, прва контролка на хероите пред ЕП!

Македонската фудбалска репрезентација денес на Националната арена „Тодор Проески“ ќе одигра пријателски натпревар со Словенија, како дел од подготовките за историскиот настап на Европското Првенство ова лето.

Ова ќе биде прва проверка за подготвеноста на избраниците на селекторот Игор Ангеловски пред настапот на ЕУРО 2020 и тоа против селекција со која многу добро се познаваме.

Она што е од особена важност, е тоа што по подолго време навивачите ќе имаат можност да се вратат на трибините. За овој натпревар пуштени се десет илјади билети, односно 30 % од капацитетот на стадионот, па фановите на „црвено-жолтите“ ќе имаат можност уште еднаш да им дадат поддршка пред настапот на континенталниот шампионат.

Сакаме победнички да патуваме на ЕУРО 2020

Ова е и прв меч за Македонија по историската победа во Германија со 1:2. Ќе биде интересно да се види како ќе одиграат нашите фудбалери по една таква победа. Играме дома, а во Скопје последен пат загубивме пред две години од Австрија во квалификациски меч со 1:4. Од тогаш, на домашен терен одигравме седум натпревари на кои забележавме шест победа над: Словенија, Израел, Ерменија, Косово, Естонија и Лихтенштајн и едно реми против Грузија.

Важно е да се продолжи победничката серија, особено што следува ЕУРО 2020, за таму да тргнеме со победнички мисли. Добро се знаеме со Словенија против која имаме позитивен скор. Во минатите квалификации, токму за пласман на ова Европско Првенство на гости беше 1:1, а во СКопје славевме со 2:1. Нека биде така и овој пат.

Без премногу експериментирање

Од 26-те репрезентативци кои треба да не претставуваат на ЕП, недостасуваат само Енис Барди, кој е во карантин поради ковид-19, како и првиот голман Столе Димитриевски, кој имаше обврски со Рајо Валјекано. Тој стигна доцна синоќа во Скопје, но ќе го пропушти овој меч со Словенија. Селекторот Игор Ангеловски, најави дека нема да експериментира премногу и ќе оди на победа на овој меч без разлика што станува збор само за контролен дуел.

Веројатно ќе стартуваме со 5-3-2 формација, која во офанзива би се менувала во 3-4-1-2. На голот би требало да биде Шишковски, а во дефанзива Муслиу, Велковски и еден од двајцата – Бејтуалаи или Кире Ристевски. На Бочните позиции ќе бидат Алиоски и Стефан Ристовски. Во Средината во отсуство на Барди, ќе стартуваат Николов и Адеми кој подоцна се приклучи на подготовките, а Елмас би играл како лажна деветка или по левата офанзивна страна. Како најистурени би требало да стартуваат Пандев и Тричковски ( Трајковски ).

Кек ќе испроба нови фудбалери

Словенија има доста интересен и силен тим. Имаа одлична серија од девет меча без пораз, но на двата последни дуели во квалификациите за Светското Првенство одиграни во Март загубија од Русија и Кипар на гости. Особено загрижувачки е поразот во Кипар. Ќе го пропуштат ЕУРО 2020, па ова за нив е припрема за продолжение на квалификациите за Мундијалот. Матијаж Кек направи неколку промени во играчкиот кадар и сака да испроба некои нови фудбалери против Македонија. Кек најави дека ќе го искористи пријателскиот натпревар за да тестира нови имиња кои не се во проширениот состав.

За првпат, Кек за мечот со Македонија ги повика Игор Векиќ (Браво), Свен Кариќ (Домжале), Жан Рогељ (Тирол), Јан Млакар (Марибор) и Бенјамин Шешко (Лиферинг). По неколку откажувања, во селекцијата се повикани и Жан Залетел (Целје), Јан Репас (Марибор) и Марио Јурчевиќ (Осијек). Интересно, но со само 17 години, Бенјамин Шешко е најмладиот играч во селекцијата која доаѓа во Скопје и тој важи за најголема фудбалска надеж на словенскиот фудбал.