Европската фудбалска федерација (УЕФА) склучи нов, долгогодишен договор со компанијата Fanatics, кој внесува сосема нов и изненадувачки детал на дресовите на играчите кои првпат ќе играат во Лигата на шампиони.
Се очекува овој чекор да донесе милионски вредности на пазарот на колекционерски предмети.
Според ексклузивни информации што ги пренесе познатиот спортски новинар Дејвид Орнстин од The Athletic, УЕФА и американскиот гигант за спортска опрема и колекционерски производи Fanatics (сопственик на познатиот бренд Topps) се согласија на продолжување на соработката за уште шест години, до 2033 година.
Најзначајниот и највпечатлив новитет што го носи овој договор е т.н. “Беџ за дебитант”. Секој фудбалер кој од оваа сезона го бележи своето прво, историско учество во ова престижно клупско натпреварување, ќе носи посебен беџ на својот дрес.
По завршувањето на натпреварот, тој беџ ќе биде внимателно изваден од дресот и вграден во уникатна колекционерска картичка на Topps (т.н. “1-of-1” серија) која играчот лично ќе ја потпише.
Овој иновативен концепт веќе постои и е исклучително популарен во американските спортови, посебно во НБА лигата, каде ваквите картички со беџ од дебитантскиот натпревар се продаваат за неверојатни суми.
Колку овој пазар е профитабилен, најдобро покажува фактот дека се проценува како една таква НБА картичка со “беџ за дебитант” наскоро на аукција ќе достигне вредност од неверојатни пет милиони долари.
Замислете само колку би можела да вреди уникатна картичка со оригинален, носен дел од дресот на некое ново “дете-чудо” од неговиот прв натпревар во Лигата на шампиони.
Оваа иницијатива е јасна стратегија на УЕФА и Fanatics да го капитализираат растечкиот пазар на спортски сувенири, додека фановите и најбогатите светски колекционери ќе имаат можност да го поседуваат ваквиот уникатен предмет.
Учество во игри на среќа е дозволено за лица со 18+ години. Играј одговорно!