Гвардиола потврди дека Бернардо Силва сака во Барселона

Менаџерот на Манчестер Сити, Пеп Гвардиола изјави дека сака да го задржи Бернардо Силва, но призна дека на Португалецот „многу му се допаѓа Барселона“.

Силва беше поврзуван со трансфер во шпанскиот гигант во текот на целиот трансфер период, а Гвардиола ја остави отворена вратата за заминување на играчот од средниот ред.

„Јас не сум личноста која треба да и каже на Барселона да заборави да го донесе Бернардо. Ние сакаме тој да остане со нас, но не сакам никој во тимот кој не е задоволен од условите. Првото нешто е клубовите да се договорат, но во последните две години немаше понуда за него“, изјави Гвардиола.

„Не сакам да замине. Силва е одличен играч и одлична личност. Остануваат само седум или осум дена и ќе треба да видиме како ќе се случи на трансфер пазарот. Сакам тој да остане. Но, вистина е дека на Бернардо му се допаѓа многу Барселона“, додаде Гвардиола.