Лацио проблемот со празните трибини ќе го реши со слики од навивачите

Како што работите стојат Серија А би можела да се врати на 13. или 20. јуни откако оваа недела конечно се утврдени протоколите за групните тренинзи во Италија.

Секако, натпреварите ќе се играа без навивачи, но тоа не значи дека трибините ќе бидат празни. Во Лацио добиле една интересна идеја. Тие ќе го наполнат стадионот со фотографии од своите навивачи.

„Размислувавме како можеме да им дадеме прилика на навивачите да бидат на стадионот кога натпреварите повторно ќе продолжат. Можам да ви откријам дека работиме на тоа и следната недела шемата ќе биде функционална. Оние кои ќе сакаат да дат поддршка можат да ни испратат нивни фотографии, а ние ќе ги наредиме на столчињата“, објави клупскиот директор за јавноста на клубот, Стефано Де Мартино.

„Дополнително ќе објасниме како навивачите можат да учествуваат бидејќи работиме на интернет страницата посветена на оваа иницијатива“, додаде Мартино.