Јунајтед преговара за младата ѕвезда на Спортинг Лисабон

Манчестер Јунајтед покажува сериозен интерес за дефанзивецот на Спортинг Лисабон Гонзало Инасио.

20-годишниот дефанзивец одигра одлична сезона за португалскиот гигант и тоа го привлече вниманието на „црвените ѓаволи“ кои сакаат да го однесат на „Олд Трафорд“.

Новиот менаџер, Ерик тен Хаг го одобрил трансферот и шефовите веќе започнале преговори за негово привлекување, тврди „А Бола“.

Инасио има откупна клаузула во договорот вредна 45 милиони евра. Сепак, Јунајтед не сака да го плати одеднаш, туку ќе се обиде да постигне договор за трансфер на сумата на неколку рати.

Инасио е дете на Спортинг, а од 2020 година е во првиот тим на клубот од Лисабон, а важи за еден од најголемите таленти во Португалија.