Ѕвер од играч: Лилард со рекорд на франшизата од 59 поени – ги носи Потрланд во плејоф доигрувањето

Еден од најдобрите плејмејкери во НБА лигата, Демијен Лилард, ја обележа изминатата ноќ во НБА лигата. Бекот на Портланд на натпреварот со Јута (101:86) постави рекорд на франшизата со 59 постигнати поени.

Портланд ќе го освои осмото место во Западната конференција и ќе игра против Голден Стејт во првото плејоф коло, откако славеше над Јута и стигна до скор од 40 победи и исто толку порази.

Портланд има две победи и натпревар повеќе од Денвер, кој се наоѓа на деветтото место на Западот.

Лилард одигра неверојатен меч против екипата од Солт Лејк Сити, постигна 59 поени (9/14 за три), на кои придодаде 6 скока и 5 асистенции. Импресивен е податокот дека Лилард мечот го заврши без загубена топка и без направена лична грешка, иако на теренот мина 42 минути.

Изминатата ноќ по повеќенеделната пауза на терените се врати и Кевин Дурент, кој имаше учинок од 16 поени, 10 скокови и 6 асистенции во победата на Голден Стејт над Њу Орлеанс 123:101.

Голден Стејт го предводеше Клеј Томпсон со 20 поени, а натпреварот го „прескокна“ Стеф Кари.

На останатите натпревари: Клиперси го совладаа Сан Антонио 98:97, Индијана го надигра Орландо 127:112, Бостон го победи Шарлот 121:114, Чикаго загуби во Бруклин 107:106, а Вашинготн славеше во дуелот со Мајами 106:103.