Спалети: Натпреварот против Сасуоло за нас е како полуфинале

Фудбалерите на Интер утре на „Џузепе Меаца“ во рамките од 37 коло во Серија А ќе играат против тимот на Сасуоло.

„Нероаѕурите“ во италијанското првенство се наоѓаат на петата позиција и се борат за местото кое води во Лигата на шампионите, а следната препрека е натпреварот против Сасуоло, кој Спалети го опиша како полуфинале.

„Играчите на тренингот работат максимално, а тоа е знак дека нивниот фокус е ставен само на следниот натпревар против Сасуоло. Тој натпревар е како полуфинале за нас. Ова беше долга сезона и сега пред нас е еден вид полуфинале кое може да не доведе во позиција да играме финале против Лацио“, изјави Спалети.

На две кола пред крајот Интер има два бода помалку од четвртопласираниот Лацио, а доколку двата клуба слават за викендот, патникот во Лигата на шампионите ќе го добиеме по нивниот директен дуел во последното коло на „Олимпико“.

Натпреварот помеѓу Интер и Сасуоло се игра утре со почеток во 20:45 часот.