Сон: Јас постигнав четири гола ама Кејн беше неверојатен

Toтенхем вчера на гости го победи Саутемптон со високи 2:5.

Сон Хеунг-Мин постигна четири гола и така стана 28 играч во историјата на Премиер лигата на кого му успеало во еден натпревар да стигне до „покер“.

Фудбалерот од Јужна Кореја е познат како скромен, понизен и дисциплиниран. Тоа го докажа и со изјавата по овој натпревар. Иако постигна четири гола тој не сакаше да ја собере славата само за себе.

„Неверојатно е да се постигнат четири гола во натпревар од Премиер лигата. За мене е голема чест. Не би ги постигнал головите да не беше Кејн. Тој е неверојатен. Ми асистираше четири пати и ја заслужува наградата за играч на натпреварот. Работиме заедно пет сезони“, порача Сон.