Пеле исфрлен од репрезентацијата – нема да игра против Македонија!

Еден од најинтересните натпревари во овој квалификациски циклус секако беше дербито помеѓу Италија и Шпанија кое заврши без победник 1:1.

Сепак, главна тема денес во италијанските медиуми е напаѓачот на „аѕурите“ Грациано Пеле, кој беше стартер на натпреварот, но во 59-та минута беше заменет со Чиро Имобиле.

При излегувањето од игра Пеле направи голема глупост и не се поздрави со селекторот Вентура, туку налутен веднаш седна на клупата.

Денес Италијанската федерација одлучи да го исфрли Пеле од репрезентацијата „поради недолично однесување“, па напаѓачот нема да патува за Скопје и нема да биде дел од тимот за натпреварот против Македонија.

Сеуште не се знае дали на негово место ќе биде повикан друг напаѓач, а медиумите шпекулираат дека е можно повик да добие „контроверзниот“ Марио Балотели.