Официјално: Клосе се врати во Баерн Минхен

Поранешниот германски репрезентативец Мирослав Клосе ќе му се придружи на тренерскиот штаб на Ханси Флик во Баерн Минхен, соопштија денес од клубот.

Најдобриот стрелец во историјата на Мундијалите и поранешен напаѓач на Баерн Минхен се врати на „Алијанц Арена“ и потпиша едногодишен договор.

„Се чувствувам одлично и со нетрпение ги очекувам моите задачи. Ханси Флик и јас со години добро се познававме од репрезентацијата. Имаме меѓусебна доверба, професионална и лична, за мене, ова е голем чекор напред како тренер, се надевам дека ќе можам успешно да го искористам моето досегашно искуство и ќе му помогнам на Баерн Минхен да ги реализира своите зацртани цели“, изјави Клосе.

Како фудбалер, Мирослав Клосе играше за Баерн помеѓу 2007 и 2011 година, каде постигна 53 гола на вкупно 149 натпревари.