![](https://sportski.mk/wp-content/uploads/2024/07/d.png)
Денес очите на цела фудбалска Европа се вперени во второто полуфинале помеѓу Англија и Холандија.
Англија и Холандија ќе се борат за билет во финалето и навидум ова е очекувано полуфинале, но според играта Англичаните не заслужија да стигнат до полуфинале.
Англија игра под очекувањата
Лига Нации: Се освен прво место ќе биде катастрофа за Македонија! ↓↓↓
„Гордиот Албион“ пристигна на ова Европско првенство како еден од најголемите фаворити и според квалитетот секако тоа го заслужува, но според играта воопшто не ги оправда очекувањата. Критиките кон селекторот Саутгејт се се пожестоки, во групната фаза запиша само една победа, а потоа против Словачка беше пред елиминација и се спаси во последната секунда. За последниот меч против Швајцарија ја промени тактиката и започна со тројца во одбраната, што воопшто не функционираше на терен и Англија играше многу лошо. Меѓутоа, на крај сепак успеа после изведување на пенали да се пласира во полуфинале. Сега играат против репрезентација која игра отворен и допадлив фудбал, па воопшто нема да им биде лесно, но секако треба да се напомене дека Англија има играчи кои можат да го решат мечот со еден потег.
Голема шанса за Холандија
„Лалињата“ иако со многу проблеми пристигнаа на ова ЕП, сепак целосно ги оправдаа очекувањата. Куман не можеше да смета на Де Јонг и Копмајнерс, па поради тоа ретко кој ја набројуваше Холандија меѓу главните фаворити. Меѓутоа, репрезентацијата игра допадливо, покажа карактер и освен на мечот со Австрија на сите други натпревари играа одлично. Против Романија во осминафиналето блескаа, а против Турција успеаа со пресврт да стигнат до полуфинале. Интересно, Холандија победи со автогол на Турците, кој беше 10-ти автогол на ова Европско првенство што е куриозитет. Четвртфиналните натпревари беа израмнети и три од нив завршија реми по 90 минути игра, а две се решаваа на пенали. Неизвеснот се очекува и во полуфиналето, но ова е голема шанса за Холандија да ја искористи слабата форма на Англија.
Очекување
Двете репрезентации ќе бидат претпазливи бидејќи влогот е голем, но играат отворен фудбал, па очекуваме возбудлив меч со голови на двете страни.