Манчестер Сити и Интер на чекор до полуфинале🎥

Манчестер Сити и Интер запишаа големи победи во првите четвртфинални натпревари против Баерн Минхен односно Бенфика.

Интер успеа да слави на гостински терен во Лисабон, иако Бенфика беше благ фаворит пред почетокот на дуелот.

Италијанеците одиграа одлично тактичко прво полувреме, и го оставија поседот на Бенфика, но одлично се бранеа и се закануваа преку контранапади.

На стартот на вториот дел еден таков контранапад во гол го претвори Николо Барела, за предност од 1:0.

Бенфика не беше воопшто опасна, а во 80-та минута Интер доби пенал после играта со рака на Жоао Марио во казнетиот простор. Прецизен од белата точка беше Лукаку за конечно 2:0.

Манчестер Сити има неочекувано високи 3:0 после првиот меч во дербито со Баерн Минхен.

Во првите триесетина минути гледавме израмнет дуел и класично одмерување на силите, а потоа следуваше „проектил“ на Родри за водство на „граѓаните“, резултат со кој се замина на одмор.

Во вториот дел гледавме израмнет фудбал, а во 70-та минута Халанд испрати одлична топка до Бернардо Силва, кој погоди за 2:0. Седум минути подоцна и самиот Халанд се запиша во листата на стрелци за високи 3:0.