Лајпциг – Аталанта: Дуел кој ветува возбудувања и голови

Лајпциг е домаќин на Аталанта во првиот меч од ¼ финалната фаза во фудбалската Лига на Европа. Ова е еден од поинтересните дуели во оваа фаза, особено што италијанските и германските екипи секогаш меѓусебе играле крајно интересни и неизвесни натпревари.

Пред првиот натпревар во четврток во Германија, клубот од Бундеслигата уживаше во една од своите најслатки победи сезонава, додека нивните гости продолжија со променливите резултати во Серија А, кои реално се во целосна спротивност со импресивната европска форма на тимот.

Тедеско го препороди Лајпциг

Откако завршија на третото место во групата А во Лигата на шампионите минатата есен, зад конкурентите од тешка категорија, Манчестер Сити и Пари Сен Жермен, многу нешта се променија во РБ Лајпциг, кој сега ужива во одличната форма под водство на новиот тренер Доменико Тедеско.

Поранешниот шеф на Шалке седна на жешкото столче кон крајот неуспешната кампања во елитното европско натпреварување и од денешна гледна точка, може да се каже дека е навистина штета за тимот што тој не беше менаџер барем неколку недели предходно.

Не само што го подигна нивото и секако пласманот во Бундеслигата, тимот од Саксонија го победи Реал Сосиедад во плеј-офот во Лига Европа уште во Февруари, кога победи со 1:3 на гости во Сан Себастијан и славеше со конечна победа со вкупни 5:3.

Што се однесува до минатата фаза, Лајпциг имаше среќа. Поради исфрлувањето од европските купови на руските екипи, тие не го одиграа двомечот со Спартак Москва и целосно се насочија кон домашниот шампионат.

Во последните дуели, Лајпциг победи само на еден од последните пет европски натпревари на домашен терен и тоа е потенцијален знак за опасност. Сепак, пред пристигнувањето на Аталанта во четврток, Тедеско и соработниците се надеваат дека ќе ги повторат нивните последни две гостувања наместо да мислат на домашните неуспеси – го декласираа Гројтер Фурт со 1:6, а минатиот викенд беа убедливи во дербито кај Борусија Дортмунд со 1:4.

Аталанта со офанзивни проблеми

И покрај елиминацијата од групната фаза во Лигата на шампионите кон крајот на минатата година, Аталанта продолжи да импресионира во континенталниот фудбал, з аразлика од натпреварите во Серија А, каде игра крајно променливо.

Неодамнешниот пад во Серија А покажува дека тимот на Џан Пјеро Гасперини се соочува со сериозен проблем за да го обезбеди своето враќање во Лигата на шампионите преку пласман во топ четири екипите во Италија. Тие се на седмото место на табелата по поразот од Наполи со 1:3 во неделата – сега со осум бода заостанување од четвртопласираниот Јувентус.

Сезонава тимот од Бергамо го елиминираше прво Олимпијакос со вкупни 5:1, пред да го исфрли Баер Леверкузен со вкупни 4:2. Аталанта веќе славеше во Германија сезонава и тоа може д аи биде ветер во грб пред овој меч со Лајпциг. Добро знаат што ги чека, без разлика што Лајпциг веројатно има нешто поквалитетен состав за разлика од Леверкузен.

Проблемот во последно време е офанзивата. Головите во Серија А пресушија по отсуството на најдобриот стрелец Дуван Запата пред крајот на минатата година, при што се јавија големи проблеми за Гасперини. Конечно Запата се врати на тренинзите и тренира во полн интензитет, а со Наполи се наоѓаше на клупата. Голема е шансата Запата конечно да се врати на теренот на овој меч во Германија.