Крај на една ера: Во Реал Мадрид следи реконструкција!

Реал Мадрид во следниот преоден рок би требало да направи големи промени во тимот откако оваа сезона остана без титули во Примера (најверојатно) и Лигата на шампионите.

Клубот од Мадрид не успеа да се опорави после заминувањето на Кристиано Роналдо и тренерот Зинедин Зидан, а од новите играчи се истакна само 18 годишниот Бразилец, Винисус Жуниор.

Иако навивачите на Реал бараат заминување на Флорентино Перез, јасно е дека тоа нема да се случи. Реално е Перез да го растури тимот кој четири пати во пет години ја освојуваше Лигата на шампионите и да склопи нов тим.

Бејл и Марсело се на излезни врати.

Овие две ѕвезди се први за „отстрел“. Бејл со Марко Асенсио после заминувањето на Роналдо требаше да биде главната напаѓачка сила на Реал, а половина година подоцна е на клупата за резерви и е во конфликт со навивачите кои бараат негово заминување. Очекувањата се да се врати во Премиер лигата.

Марсело со лошата форма го изгуби местото во првите 11 од Регулион и скоро сигурно нема да остане во Реал. Бразилецот на големо се поврзува со трансфер во Јувентус кај неговиот добар пријател Роналдо.

Ќе се бара замена за Крос, Иско се почесто е на трибините отколку на теренот.

Тука не е крајот на распродажбата. Бензема добро започна оваа сезона, но сега повторно започна да потфрла и јасно е дека на „кралевите“ потребен им е поефикасен голгетер.

Тони Крос е во најлошата форма откако во 2014 година пристигна во Реал и се погласно се зборува дека ова е неговата последна сезона во Мадрид. Како и Иско кој веќе подолго време е во конфликт со Солари.

Извесно е и дека Ваљехо и Мариано ќе го напуштат клубот, а дел од шпанските медиуми пишуваат дека може да замине и Кејлор Навас иако неодамна го продолжи договорот.